EL SÁBADU 2 D'OCHOBRE A BRAÑES

Si bien l'alpinismu conozse en xeneral como'l deporte que consiste en subir altes montañes, el términu tien el so orixe n'aquellos que subíen montañes pertenecientes al macizu de los Alpes, colo que dempués tiénense acuñaos términos como "himalayismu", pa referise a los que tamién suben montañes mui altes, de fechu más altes tovía que les de Los Alpes, nel Himalaya.
Pues bien, el grupu de montaña Ramón Mercader quier reivindicar el términu "naranquismu" pa referise al arte, deporte y ciencia de caleyar los praos, sienderos y picos que conformen la guapísima cuesta'l Naranco, toa ella sita nel conceyu d'Uviéu y que, por desgracia, los más de los uvieínos nun conocen más allá de la Parrilla Buenos Aires o, como muncho, el Picu Paisanu y'l campu de tiro (pue leese con segundes).
Esti sábadu vamos facer naranquismu, en concretu ascender la cara sur de la cuesta, travesar la so creta per l'aldea de El Contriz, enriba d'Ules, dende ehí descender hasta el pueblu de Lladines y siguir camín d'Axuyán, Escontriella y Brañes.
Que naide nun se confíe, una excursión pel Naranco nun ye un paseín pa baxar la fabada, los caminos a veces son fáciles, pero a veces son mui difíciles, podemos topar munchu barru per determinaes siendes, asina que nun vaiga venir naide con playerinos y llueu quexase.
Ente Uviéu y Brañes hai unos 10 kms., la vuelta pue facese pel mesmu camín, pela carretera'l boquerón, non mui recomendable por ser asfaltu tol ratu, pero ensin pérdida posible pal que quiera más tirar per ehí, o per un camín incógnitu pa quien n'esta ocasión fai de guía y gran timonel, pero suxeríu pel hermanu Fanjul, al que se-y cederá la espada-cimitarra pa que nos guíe nel regresu de ser esta la opción escoyía.
En too casu van ser en total unos 20 kms, de desniveles y dificultaes llixeres (¡que non fáciles!).
Quedaremos a les 10:00 de la mañana del sábadu na sede de Radio QK, cai Fernandez de Oviedo nº10, baxu, quien quiera venir nun tien necesidá d'avisar, ye abondo con tar ellí a esa hora.
Que nun se-y quede a naide'l bocadillu y agua abondante.