MIÉRCOLES 8/12/2010 A PELOÑU

-Ú ta pá?
-Pá ta pa Ponga.
-Ú ta ma?
-Ma ta pa Colunga.

Aprovechando la festividá llabora derivada de la conmemoración de la preñez d'una muyer n'ausencia d'axuntamientu carnal de nengún tipu, el Grupu de Montaña Ramón Mercader va investigar los posibles oríxenes africanos de la llingua asturiana na pongueta viesca de Peloñu, sita esta nel conceyu ponguetu, ellí mesmo aú ta pá.
Eso sí, la escursión va ser aventura aventura, yá que la concienzuda investigación de mapes variaos y testemuños d'otros que fueron per eses tierres enantes que nosotros nun aporta información clara, colo que nun sabría bien dicir la distancia que vamos percorrer, tampoco'l desnivel a superar, por nun tener nun tengo yo mui claru hasta ónde vamos tener que dir en coche, pero bueno, tampoco nun pasa nada, qu'una viesca ye una viesca, y el casu ye metese n'ella, nesi momentu podremos caleyar, meditar, perdenos... toles opciones tan abiertes.
En too casu los interesaos que tean el miércoles a les 8 de la mañana na plaza de Los Ferroviarios pa tirar p'allá.